الزجل السفينة بلا بحار
نورالدين بن شقرون /مكتب مراكش
جريئة وأصلا زاعمة
تصور كل ماجرى وسار
ماخلات لا الخبازة فاطنة
ولا سوق الورد والنوار
” الفلوگات” عليهم ملازمة
هاذي خدمتها النهار وماطال
على بيتها وأولادها غافلة
زوجها تبعها في هاذ المضمار
“السوايع” المطلوبة ماهي ساهلة
مع ” اليوتوب” مايمكن تختار
زيد ” المشتركين” بنسبة عالية
الناس تشوف وتغيب في الحال
حتى على ” لايك ” ماهي باصمة
الأغلبية تجامل وباغيا التيقار
هذا “فيديو” خاص بالماكلة
الشوا طايب على صهد النار
زيد “طبسيل” الفواكه الجافة
” اتاي” في كيسان تگولها بلار
الفواكه بكل الأنواع حاضرة
خير الله موجود فيه تحتار
تعقب وتقدم وهي ناشطة
وتطلب ” اللايك” لكل من زار
تلوح ” الفيديو ” بلا مخامة
بلا أدنى تفكير ولا عبار
ماشي گاع الناس عندها وقادرة
الفقير يتألم ويتجرع لمرار
شوفو من حالو ياأحبابنا
هادشي حرام في سنة المختار
واقفا على شغلها وحازمة
الكل مجند في الدار
على ” البارطاج” ماهي غافلة
خداما بالليل والنهار
مايمكنش تبقى جاثمة
” الروتيني اليومي” به تكبار
وصلات به ناس جاهلة
وصبحات به من الكبار
عنداكي تمشي غافلة
تبعي الأورو والدولار
وانتي مربية وحاشمة
” الروتيني” سفينة بلابحار
تقدر تصبحي غارقة
وانتي مسؤولة مولات الدار
الله يخرجك غانمة سالمة
” الروتيني ” بئر بلا قرار.
