الشحمة العايفة ( زجل )
نورالدين بن شقرون /مكتب مراكش
كان ديما يتشطر ويداعي المعارفة
يگول فاهم كلشي وسليط اللسان
يتخاصم مع الناس وخاطياه لمساعفة
يخرج عينيه على الكذوب والبهتان
يظل يحسب ويخاف من لمجازفة
حتى بقى في حياتو حيران
واعد بالزواج بنات المدينة كافة
كلام البارح يتمحى اليوم يافلان
بقى يتبربص والناس منو خايفة
الرجال نبدوه عاد شوف النسوان
ثلاثين عام والبوصلة عندو تالفة
هام في بحر مافيه لامان
دازت لعوام والأيام صبحات مرادفة
خونا كبر وبدا يطيح الاسنان
لقى راسو بحال الشحمة العايفة
فاتها المش وگج عليها الذبان
الفلوس كثيرة والناس كلها عارفة
فلوس ناقصها روح البر والإحسان
قرر يتزوج واخا امرأة شارفة
تتحسن الأحوال والأيام تزيان
ساع لقفاتو شابة بشوي لملاطفة
وبالخف لبساتو بحال خاتم سليمان
على حياة النشاط المرأة موالفة
خونا حدر راسو وعطاها للخسران
يخلص عليها تافة وتزيدو تافة
تتحايل؛ هاربا من قب الشيطان
حياتو رجعات تگول حلبة المسايفة
لقى راسو وسط لهيب النيران
لا الصحة ولا السن يتحملوا معانفة
السيد سلم أمره لرب الأكوان
خلى المعقول وتبع الهتوف الزايفة
هتوف الصغر والزين الفتان
الزواج خاصو وقتو وبلا محاسفة
والنسل هبة من عند الرحمان.
مراكش: 2024/10/28
