قصيدة زجلية : روعة هذا زمان……..
بقلم الزجال: الخيشبي عبدالجليل
هذا زمان اش عندك فالسلة
شي باع الملة
ودا الغلة
أو شي كايتفلا
أو شي ما اتهنى
أو شي غنى
فشي طلع
اوشي دلى
فشي كان منا
وشي قال لينا تهلا
فشي دا لينا
او شي ساير يضحك اعلينا
شي اوصف لينا الجنة
او ما شفنا منها لا كحل لاحنة
أو كاين لي زاد فالمنة
وفكل انهار امعاه فغنة
كثر من الشطنة
واطلع فوق الكْْْْنة
أو شي طلعوه لمنصة
ظنوه خصة
طلع ماها كايجيب النخصة
مغلي فوق المقلة
او كايجيب اللهفة
اشربناه على غفلة
أو ما ألقينا مهلة
فزيد علبغل ثقلة
قالو بجنب الواد
غادي انغرسو نخلة بنخلة
فاض اعلينا ولينا فوحلة
وا فين الرجلة
طُلًعنا للكدية
او صعب اعلينا الرعية
وليتيم وليتيمة ابقاو ابلا تقدية
والدرهم ولى كيف الجمرة
ازند ما ابغى يطفى
فشي اغرق
اوشي نقز ضفة
هم او ما ابغى يخفى
فسد السوق والخلفة
اوسخ او ما نفعات فيه خرقة
كاين لي واعدنا بتقطاع النعلة
وكاين لي فرق الزرقة
وكاين لي عاود لينا خرافة لمطرقة
او كاين لي ما ابغا لينا النقا
او زايد لينا فالفقصة
او باغي يجمع من موراه فرقة
حاس براسو ارقى
فرحان بالعود من بعد الكلخة
الزهر ساعدو بالورقة
فما كاين غير اجمع لي ابقى
او ما كاين اعلامن تتكى
زادونا حلكة
او عصرونا بلمدلكة
وابقينا امعاهم اخلا
اطمعنا فالنقلة
وهبطنا فرقة
وطلعنا فرقة
واللعبة ولات مورقة
من بعد لي اتنفخ نفخة
فشي امعا
اوشي ابغا
او شي اكلا ملخة
ممن ابغى
واقيلا ولفها ما ابقى اسخى
وترخى وزاد ترخى
وقاليه زيدني اخا
