المهراز ( زجل )

نورالدين بن شقرون/ مكتب مراكش

على الدكان ولف مهرازنا
يسحق كلشي يخليه غبار
يدك عطريتنا وديال أحبابنا
ويزيد حبوب قهوة الجار
يدور على الدرب ديالنا
الجيران يطلبوه بلا تكبار
وجهو مقزدر بحال زماننا
مايحشم مايخلي وقار

لقيناه مع ورث سلافنا
وأصبح هو مول الدار
ما ادى منو الزمان بحالنا
ولا تأثر بحريق النار
معدن صلب من خارج بلادنا
كلو نحاس خالص المعيار
نغسلوه ديما بعد استعمالنا
يرجع ناصع بحال البلار

اليوم يحكي ويبكي مهرازنا
هاذ الجيل مافيه ماتختار
كلام يؤلم نخليوه بيناتنا
أحسن بلا فضيحة وبلا نفار
فين حداگة امي فاطنا ؟
يد المهراز معها تحتار
تدك حتى تفيق جيرانا
وجدي يطلب منها التشوار
الله يرحمها ويرحم اجدادنا
ما تخلي لا عطرية ولا سكار

مشى تخبا وتركن مهرازنا
مع الديكورات ديال الدار
فضل يسكت وما يفضح اعوارنا
ويضل يشوف طول النهار
تلفنا الطريق وضاع صوابنا
نستهلكوا المطحون بلا شوار
غاب الجهد وبردوا كتافنا
والمهراز يتألم ويتجرع المرار.

مراكش : 2023/03/04