اللقلاق المقاوم الشهيد
نورالدين بن شقرون/ مكتب مراكش
كلامي موجه للناس كافة
كلام صحيح مافيه بهتان
جارتي مني ديما خايفة
خوف زاد طول ليها اللسان
تكذب عليا والناس شايفة
ولا واحد من تريكتها حشمان
على المغرب الناس موالفة
تغرب الشمس ويطلع الأذان
سميتي تخلي العسكر تالفة
لازمها تتغير في الآن
حذفوها بجهل وقلة المعارفة
غيروا سنة المصطفى العدنان
لاشغل لا مشغالة والحرفة تالفة
أولاد جارتي غاديين في الخسران
شحال من الدول عليهم هارفة
واكلين فلوسهم من المزيان
يصفقوا لحماقهم وشوي المساعفة
يعطيوهم الغاز بأقل الأثمان
جارتي ماقادرة على مجازفة
دلقوش كبير يحير الأذهان
صبحات عندها الكذوب مرادفة
كذوب مايقبلها عقل إنسان
حتى الكعبة ماخرجات سالمة
من خرايف جارتي يا فلان
تقول عليها وهي واهمة
كانت عندها في غابر الأزمان
زيد الكذبة المشحمة الداسمة
مايمكن تهضمها واخا جيعان
الحاكم نجا من موت جاثمة
كان صبي يوم هجموا العديان
خطفوا اللقلاق بسرعة تامة
وطار به في الأجواء نيشان
سلموا لأسرة حالتها موالمة
وكانت هاذيك مشيئة الرحمان
اللقلاق أصبح شهيد بلا مساومة
والحاكم اليوم للسفينة ربان
ينشر الخرايف والبدع بلا مخامة
وغروب الشمس ماهو للنسيان
المغرب وردة فايحة ناسمة
على إسمها يتظبط الأذان.
مراكش 2023/05/25
