لمصيدة ( قصيدة زجلية )

محمد الادريسي
المغرب

نهار يطيح
الحرف ف لمصيدة
داك النهار نمضي لمداد
ندبحو فقصيدة

نعرض ع لقلب والخاطر
الكسدة والذات
نعيط لهم ف تنهيدة

نقابل لكلام لا يزند
المعنى بالحر ݣدات
عليهم نش بجريدة

قولو علاش الطير
ندب حظو ف سكات
ما ندبو ف تغريدة

علاش سجين لقفاص
بالفر جناحو تهدات
عاش حياتو وحيدة

تاق الليل فظلامو
لما الشمس شهݣات
وحجبات نجوم عديدة

ما تاق الحك فغطاه
غلل ايديه ما سخات
ما سقى ديك لوريدة

يا الحادر عني عنيك
نار العشق شعلات
رجوعك يطفيها ف تخميدة

رجع لحظني الله يهديك
عليك الحروف شهدات
لا تشوي هاذ لكبيدة

لفراق عمرو ما يغني
لي خان العهد وفات
عواصف ومواج شديدة

لا تݣولو فالعشق ما يدري
ما يعرف لهفات
ما طيحو ف تمرميدة

لا تݣولو كبر وشاب
وبدا يخرف لورݣات
مزال لجراح جديدة

لا تحسبوني فالوقت واقف
تا نتلف الخطوات
داير السبة ب لمصيدة

لمداد حبرو واضح
طاح فيد الحداد
مضاه ب حديدة

وانا مزال حاضي
لا يطيح الحرف
ويجبر العين ركدات
داتها ت غميضة

30 08 2022