ثقافة وفن
زجل ….على مقاس الخاطر…
بقلم محمد الادريسي
ياك انا غ مسخر
ل ديك الخاطر
هي تأمر وانا نفد
ونݣول حاضر
تامرني نجيب من لحروف
جوج قناطر
ومن لكلام نعمر ونشوف
واش ظهري عليهم قادر
نجيب باش نداوي لهموم
وجراح الماضي
يزهق الخوف ويبياض
حموم الحاضر
يرجع لونو ناضي
نمشي نجري نغوص فالبحر
ونغامر
يتقسم ظهري نُّوض فالفجر
ونبات ساهر
ما يهمني عذاب ما يهمني بخنجر
الى تغرس بنية لغدر
ما يهمني غير تكسار الخاطر
ياك قالو عني كلام
قالو عني هضور
وشلا محاضر
زمان فيه كثرو الوحوش
نياب مكشرة باللهطة تتقاطر
الباطل فكل مكان مفروش
وشي معقول
رݣدوه بين المساطر
ما انا زجال ما انا اديب
ولا شاعر عل مناصب نتعاصر
انا غ صياد لحروف
نفصل ونغزل على مقاس الخاطر
