العرس ” الخاوي”

نورالدين بن شقرون/ مكتب مراكش

هاذي قصة جار بلاني به الرحمان
مكشر على أنيابو وساد البيبان
مخنزر لا سلام ولا كلام مزيان
تصبح عليه يطلع نهارك خسران
عندو خير الله وديما زعفان
حاسدني على الهنا والقناعة والأمان

قرر يزوج بنتو للا إيمان
بنت مخلقة وجميلة تخليك ولهان
أعطاها لواحد الغندور ماعندو عنوان
كبير في السن وما هو خجلان

في العرس ستا فلان وفلان
وخلا أحبابو ونسى الجيران
على الفور فاجئو الحاج سلمان
السيد راس السوق وأكبر الأعيان
اعتذر قبل العرس وخلاه غضبان
تبعوه ناس آخرين واعتذرو في الآن
ورجع خونا غادي تلفان

هادشي ماكانش في الحسبان
يدور في الدرب ويطلب الشبان
يعمرو العرس وزاد حتى الصبيان
سمعت خرصة بابي وكثر الدقان
لقيت صاحبنا يترجاني وهو حشمان
انت حبيبي وصديقي وحنا جيران
مرحبا بيك عندي واخا غير تبان

اعتذرت منو حيث صابح خدام
وحواييج العرس باقيين عند الصبان
زايدون راسي ماشايط عليا يافلان
تعمر بيا الشقف وتصايب الميزان
هذا درس ليك بداه الحاج سلمان.

مراكش: 2022/11/07