استغاثة ” قطرة ماء”
استغاثة ” قطرة ماء”
يلقاوني الكبار والصغار
وعلى خدمتهم مانتوارى
معاهم بالليل والنهار
ماكاين غير هاك وارا
نعمر قباب الحمام
ونبقى غاديا نتسارى
الصنبور ماعندو لجام
ديما مطلوق شرارة
العيالات مامعاهم شوار
وأنا من عادتي صبارة
لازم أربع قباب كبار
لسوالف للا زروالة
زيد الصابون والحكان
الجرة كاملها خسارة
ترجع ناشطة للدار
وانا نتجرع المرارة
الحاج يتوضا بشلال
وانا نسيل غزارة
فين وصية العدنان ؟
نذكروه في كل صلاة
الاستعمال لازمو لعبار
التبذير قمة الدصارة
الماعن يتغسلوا بالتهوار
” الماگانا” تجري دوارة
قريب نضعاف وانهار
والناس ماهي سواقة
مسابح الفيلات الكبار
حرام ياقلوب لحجارة
الناس تغوت في الدوار
وتقولوا عليها مغيارة
مابقى لي مانختار
تقادت ليا المهارة
نقصات وشحات لمطار
مابقى فشوش وحزارة
انا القطرة مولات الدار
بلا ماء كلشي هزالة.
مراكش: 2022/11/10
نورالدين بن شقرون
