” التنوعير “

نورالدين بن شقرون// مكتب مراكش

كلا وصرط بلا نديغ
دوز اللقمات نيشان
خاص الفرصة ماتضيع
تندغ تبقى عطلان
لازمك تكون سريع
قبل لايوفت الآوان
خونا عايق ونبيه
دار كلشي في الحسبان

كان مسؤول رفيع
في مؤسسة ت المال
صال وجال بلاحسيب
خونا كان هامان
يسكت كل رقيب
عليه يتغاضى في الحال
بقرتنا كثيرة الحليب
تشربوا تغير الأقوال
عينيك على الباطل تغيب
والحق عند رب الأكوان

مشات الأيام وجات
واخا الدقة فينا جات
فعايل خونا تمحات
ودغيا نسينا ل فات
عقولنا فيها أكبر ممحاة
تمحي وتقلب الصفحات

خونا جمع الكثير
عايش تقاعد الأسياد
يظل يدير الخير
أصبح كثير الإحسان
على الحج مايغيب
حاضر في كل الأعوام
لا حد يقول فيه العيب
السيد مومن وفقهان
يسمعوه باحترام كبير
يتيقوه بلا تخمام
ديما يردد ويشير
” ماعمر غرني الشيطان
كنت مسؤول نظيف
الرشوة ما تدخل للدار
إنما الهدية ماشي عيب
محللة في كتاب الرحمان”

من حقك تحلل التنوعير
هاذي بلاد الناس العميان
مايسولوش منين هاذ الخير
المهم شحال عندك الآن.

مراكش : 2022/06/20