نورالدين بن شقرون/ مكتب مراكش
قربات السحابة من السحابة
وشعاع الشمس علينا تحجب
السماء رجعات كلها ضبابة
گلنا اليوم الشتا غاتصب
الأرض عطشانة وناقصة صابة
كل قطرة صبحات مكسب
البهيمة وكل شجرة في الغابة
تتسنى الشتا باغيا تشرب
ولفناها صريحة ماشي كذابة
هي والشتا خاطيهم اللعب
اليوم راها مزحة ودعابة
الضبابة خرج فيها العجب
بالخف لبسات ثوب الشلهابة
قوم المظاهر واللسان يعطب
ديما حاضرة تگولها مصوابة
الشتا غابرة والجو يگلب
الإنسان متمادي ماضارب لحسابة
الأرض غاديا تسخن وتلهب
الغابة تحتارق رجعات خرابة
وبنادم باقي فيها ينهب
البحر يلاه تشوفو دابا
زبالة، يظل يقاوم الرعب
ياما ناقشنا وحللنا والكتابة
وكلشي مع الوقت يذهب
ديما نعاودوا نفس الخطابة
” الأمازون” راه هلكها الحطب
في كل” كوب” نتراشقوا لعتابة
والحكيم فينا باقي ماغلب
ك بغينا الضبابة تبقى ضبابة
وحنا كوكب الأرض عليه نكذب
رجانا في خالقنا مول الصابة
قادر يرجع كل قاسح رطب
تطيح الشتا وتصفى الضبابة
ويرجع للساگية الماء لعذب.
مراكش : 2023/07/11
