زجل بعنوان “الفهايمي”

زمم ياقلم
ولا تزمم كلام العار
لا تقول الهم
لا تبوح بالاسرار
لي فقلبو السم
مايبان مايخطف لبصار
القرد كي يتعلم
بعجاجتو يعميك بالغبار

يضحك معاك اليوم
وغدا يصبح حرايمي غدار
الوجه مكمش
القلب ماشي صافي
العين ترمش
ضوها ماكان كافي
الودن طرش
تسمع لوتار الحافي
مالك تحنقز
بجوج حروف خنازو ليك فالفم
الفهايمي يبان
من كلامو مغرور يقول أنا نفهم
كون كنتي فاهم
كون كاع ماترقع و دمدم
راه الحكيم يكون ساكت
لايتعالا لا يتغر لايتهكم
لا يقول أنا عارف
حيت العلم فوجهو مرسم
والجاهل يتعرف
بلسانو الطويل من الراس لكدم
يشكر فهذا و فذاك
يزوق الكلام ،ريحة النفاق منو تشم
لي عطاه ربي القبول
يشكر ربي اللي عليه نعم
و القلب الصافي يبان
على السيفا بالفم المبسم
بقلم الزجالة خديجة إدريسي توراغتي