التريتور المرشح

نور الدين بن شقرون /مكتب مراكش

قرب العرس يتقادا
التريتور* تالف ك العادة
مرشحنا لازم يحسم دابا
العرس الجاي اقسح من هذا

بدا يجمع الطباسل* الباقيين
خونا عارفهم لاش لايقين
معاه شلة من المتخصصين
في مدرسة التسمسير* قاريين
وديما في العراسات كاينين
ياك مالين الشي غافلين
وعلى حقوقهم  ساكتين

يدور ويسال الحاضرين
ياك على خدمتنا راضيين
وحنا ليكم  ديما طايعين
وعلى مصالحكم  محافظين
تلقانا طالعين هابطين
عند المسؤولين الحاكمين
وعلى راحتكم ساهرين

عقلوعلينا يالغاليين
الانتخابات راه جايين
دخلناها بألوان مغاريين
لقدام صبحوا كاشفين
كانوا في العصور الغابرين
وبقاوا في بلايصهم شادين
وحنا معاهم مخالفين
ألوان صبحات من الباهتين
وعلى الصدارة مامفاكين

قليب ” الفيستا”* أصبح عادي
عاق به الغادي والبادي
المرشح خدمتو هاذي
بحال ” التريتور” عبد الهادي
ما تفهم لا ذي ولا ذي
وزيد حتى واحد ما داوي

علاش ماندير بحال خالي ؟
الله يرحمو ما كان يبالي
ب التريتور رخيص ولا غالي
هذا سوق دخلوه الناس بحالي
الحادق فينا مسهوت ومسالي
.
كان يقيم العرس في الدار
مايخلي لا حبيب ولا جار
يوقف على شغلو ليل ونهار
ويحاسب المرشح على كل ماسار
العرس مديور للكبار والصغار
خذاه التريتور ضربنا الكار

شرح الكلمات الدارجة:
*التريتور: ممون الحفلات
* الطباسل: الصحون
التسمسير: المراوغة واللف والدوران
* كاشفين: تغير لونهم الأصلي
مامفاكيين : لن نتنازل  :
* مسهوت ومسالي : متعب
* الكار : الحافلة.

مراكش : 2021/08/14