زجل ( الجابية… لمرى جابية )

زجل… الجابية… لمرى جابية
والرجل دلو
تكون لو خابية
يشرب فيها عقلو
إلا كانت لجابية
صالحة ما تقطر
تصيبها قانعة
عايشة فالستر
من جيوب الدلو
تصنع ربيعو خضر
حتى الا كان مخروب
تصلح ليه المعطوب
تنقيه من العيوب
من صبرها تلبسو توب
يبقى فلقلب محبوب
من دمها تصنع لو مشروب
المرأة مخلوقة كنز
ربي للرجال هذاها
تسحرو لو يكون عنس
بزين كلامها لحلاحة
فيها المعلمة
وأساتذة وطبيبة
ومن كل الأشغال لغريبة
فيها المرأة الفلاحة
وللأمة صلاحة
قمر فالدار وضاحة
كي نشوفها نحس بالراحة
هي امي وختي
هي جدة وعمتي
هي مرتي نطلب منها السماحة
المرأة جابية
تسقي جناب حواضها
والراجل دلو
يطلع الماء من عماقها
يرد بيه عقلو
ويروي بيه حقلوا
يخفاف عليه الهم
لي على لكتف متقلوا
متقلوا..
محمد الادريسي