“جدبة الحروف “

ماهموني اللي خانو
ماهموني اللي نساو
ماهموني اللي ضاعو
ماهموني اللي حكاو

قالو عليه
بوهالي
مجدوب
وجدبتو عاجباه
إيلا نتا معالي
هو الارض شادّاه

آسيادي داويو حالي
راني مضيوم
فين القلب الصافي
الحال مهموم
فين اللي معقول بحالي
الدم مسموم

يا الوالي
فين ولادك ف طرقاني
فين اهل النية
والصدق
قْلّبت ف كَاع ركّاني
قالو بوهالي حمق

التراب مْسّوه العديان
والسوس طالع فالغصان
بين غصان هاديك الشجرة
عواجت
حالها مابرا
فين أوا غايبرا

واش فهاد الزمان
آمولاي ها عاري
دك وتادك مزيان
آبابا آش طاري
وتاد الخيمة كلاوه الحفاري
ب عقارب العديان

العجينة خمرات وفاضت
وعطات خبز ورغايف
كلاو شبعو خلاو الفْراتت
و ماسالو على حق الخايف
ماسالو على حق الساكت
ولا باسو اليد باش تعجنات

ماهموني اللي ضاعو
ماهموني اللي حكاو
ماهموني اللي خانو
ماهموني اللي نساو
نْدبْت أنا على اللي جاعو
وعلى للي راحو ماوْلاّو
بقلم الزجالة : خديجة إدريسي توراغتي