كلام ” خالي”

نورالدين بن شقرون/ مكتب مراكش

گال لي خالي بكري
انتوما يا أولاد نستلي
هشاش مافيكم طيسا
تاكلو الطون ولهريسا
تخليوا المعقول والرفيسا

الله يرحمو كان فيه التقشاب
نشدو فيه يضحك بلا عتاب
ديما يتهكم على وقتنا
زمان مرون كلو فتنة

زاد وگال واحد النهار
مالكوم مقنتين بحال الفار
حلو ديوركم وقلوبكم للجار
راه مايدوم غيرالواحد القهار

ديرالبركة في عشاك تعشا
تحسبها بزاف تبقى خلا
ثق في نفسك ودير النية
وانعس في البيت مع الحية

مزاح بكري هو معقول اليوم
كلامكم ناشف بحال الگوم
وجهكم معبس يشبه البوم
طلقو البشرة يااخر القوم

مال حديثكم غير عل البينگا
الفيش والكونجي في رستينگا
الكارطا ماشي ديما ترينگا
لعب اوراقك ياتريكت حنيقزة
قبل لايجمعوا ويديرو ميسا

مشيتي قبل لاتشوف لعجب
الله يرحمك ويغفر الذنب
جيل اليوم مايعرف حشومة
الضسارة حتى في وسط الحومة
مافاهم والو وماعليه لوما
والديه كارثة حتى هوما

الكلام قلال وقرب يتقادا
كلشي “مكونيكتي” اش هذا
الولد حداك تگولو حاضر
خارج التغطية وعقلو مسافر
تتكلم معاه يجاوبك الحيط
ودنيه لاصق فيهم الكيت

التواصل الاجتماعي لغة رسمية
لجهلها يبقى خارج التغطية
مشى في الصباح قبل العشية
يكلم نفسو عليها وضعية
بحال ل لابساه جنية

كملات الباهية هذا العام
جات الحروب وتشطن البال
ولا من تحرك ولا من سال
تذكرت كلام خالي في الحال
على فعايلنا ل ماليها حصار
يحشم منها ابليس الغدار
تخلط عندنا الليل مع النهار
هذا عقاب من عند ربنا الجبار

فوقاش يمكن نستوعبو الدرس
نرجعو لبعضنا ونتبتوا الغرس
طغينا اكثر من القياس
والباقي الله يحد فيه الباس

رجاءنا في العلي القدير
يزيل على Rزة هذا الوضع المرير
الله كبير ماتخفى عليه خفية
في رمشة عين يغير الكونية

2023/11/04