ثقافة وفن
* صورتك فخيالي * ( زجل )
زجل : محمد الجباري
قبل مانصافح يديك…
ونسبح فبحور عينيك
كنت راسم صورتك فخيالي
وصبح قلبي كيبغيك…
من خيالك كنغير عليك
تمنيتك تكون غايتي أمالي
خايف البعد ينسيك…
وكلام الحساد يأثر فيك
ويضيع حلمي فأعز الليالي
اشفق لحالي الله يهديك
واش فراقي يهون عليك
قلبي خديتيه مابقاش ديالي
من اول مرة حسيت بك
مثل الجمرة تحرق اشواقي
كندير باش نشرح ليك
تحني بقلبك ترتبي اوراقي
حسبني صبي بين يديك
تحملي مرة أهبالي وحماقي
صعيب نعيش بلا بك
بعدما هاجت بحور اشتياقي
