كرموصة النصارى ( قصيدة زجلية )

نورالدين بن شقرون/ مكتب مراكش

كنت نتلاوح وسماوني عل النصارى
كرموصة مشوكة وانا من لغشام
أنا والنبگ نبتوا بين لحجارة
موجودين ك الزلط وهم الأيام
گالوا عليا هندية وبليمارة
سميتي ديما تجيب ليكم التمام

بالنوادر موجودة ينقوني لعزارا
انا غلة المسكين وليه طعام
كنت عند الناس الألبة معيارة
الهندية حشوما يحطوها لكرام

وايييييه، شحال الوقت غدارة
صدقت غاديا نتساقل طول العام
هذا زمان كلشي فيه تجارة
منافعي كثيرة فاقوا بها لعجام
المختبرات تطلبني بزايد حزارة
واش انا فايقا ولا في منام

في الأسواق الممتازة حتنا نتسارى
الأناناس رجع يبان لي من لقزام
نتباع بالحبة وهاذي قمة الدصارة
فينكم ياناس هادشي راه حرام

أنتم لي سميتوني عل النصارى
هاهم صاگوني على الدوام
تغربت وانا متجرعا لمرارة
حال المسكين عالم به العلام.

مراكش : 2024/07/12