دمعة الماضي الدفين ( زجل )

نورالدين بن شقرون/مكتب مراكش

يا الدمعة النازلة على الخدود
رحميني وشوفي من حالي
ياك حررتك من لقيود
بعدما كان بكايا غالي
قلبي ديما حجر جلمود
شحال قاسا بلا مايبالي
اليوم انتي تسيلي بالمدود
وانا خايف دمعي يسالي
واد صايگ قش وعود
من فوق جبل عالي

انتي تحكي بكل جود
للغادي والجاي آش طرا لي
الحياة ك راد مول الوجود
كانت صعيبة على مثالي
ديما تايه بين هات وخوذ
نظل نحسب اش بقالي
عشت بين الأمل والوعود
وبقيت محافظ على خصالي
عندي ناس شلا شهود
الحاضرين يحكيوها للتوالي

انا اليوم بين غفلة وشرود
نتسنى النهار فوقاش يسالي
مسيطر على عقلي ويسود
الماضي لا زال يقطع اوصالي
نصحوني نتجاهلو بلا جحود
نعيش الحاضر وننظم ازجالي
بالشعر عقلي يفوت الحدود
نركب فوق حصان اقوالي
ندير ك مادارو لجدود
نرخيها حارسها ربنا العالي.

مراكش في 2024/08/30