ثقافة وفن
زجل … خاب ظني فيك
زجل … خاب ظني فيك
الادريسي محمد
خاب ظني فيك
يا لمثقلني بحمل اوزارك
قليل ما داز عليك
وعليا تلقتي حمل ضرارك
عيت الراري بيك
ما وصلت لحسان وصالك
ولا فكرت فيوم نشكيك
ولا نشيع للجموع خبارك
لحبيب لي ما ينفع
حبيبو فيوم الحزات
ما نحمَّل عن قلبي غلْ
من كلّفْتُو يراعي بالذات
نقدر ننساه نترك حسو
فالخاطر نحسبو مات
نعض صباعي من فقصو
ندفن عشرتو وكل الزلات
كان ف الروح ولف ندسو
يظل يتمختر فالليل يبات
صبح جمر فالقلب نحسو
يحرق ويزيد بحر الكيات
خاب ظني فيك
والظن هوس يسبب العلات
الريح لي جا يديك
وراق خريفك طاحت و تدلات
وقتاش ينبت ربيعك
لخضورة على غصانك تخلات
كنت ف لكلام نطيعك
قبل ما تطل بعوج الطلات
البسمة لي فطبايعك
هربات ع الخدود ما ولات
شلا هموم من صنايعك
ضهرات فالقلب و تجلات
الى خاب فيك الظن
رطب وسواس ف لدخال يزن
الثيقة طحمطات غ بالفن
رجعات ك شقوف الݣلات…
