فسحة رمضانية / أمثال وحكم شعبية.. لقطات من كلاسيكو تاريخي مابين “لقهوة”و”أتاي”… خصومة بنكهة ترفيهية

محمد جرو/مكتب مراكش

نوسطالجيانا جميعا مع الزمن الجميل وأهله ،دون أن ننقص من كل الأزمنة وتحت عنوان لكل زمن نساؤه ورجاله ،فقط لأننا نحس أننا سلبنا وتقمصنا شخصيات زائفة ونعيش بأقنعة مزدوجة ،حتى فقدت كل القيم وانصهرنا في بوثقة النفاق الإجتماعي الذي فرخ ،إلى نفاق سياسي ثقافي …الخ فرجة ممتعة..
قالت لو أنا كحلة القمقوما ،اسْناتْ عليَّا الحكومة..
يشربوني الناس مع الصباح ،وتاتْقِيَّل شبعانا مَكْهومة
وإذا جا الضيف كنَسْتر الحشومة
ماشِي بحالك أنت حريـمَل مْعَلَّق ف الرْدُوما
قال لها أنا أَتَايْ و أتايْ بَلْيَة
والناس كلها مْصَدّقَة فِيَّا
يشربوني ف الصباح ويشربوني ف العشية
وأنا جيت مْلَكَّكْ ف البَكِيَّة
عندي اربعة النجوم والكتابة عربية
واسْنَاتْ عليَّ الدولة الوطنية
ماشي بحالك ألقهوة أنت كحلة مَقْلِيَّة
كَاتْباني بْحَال البَـرِّيوْ دْيَال القْنِية
قالت لو أنا القهوة كحلة السِّيفا
كايشربني القايد وكايشربني الخليفة
واللي ما شافني شاي دَايزَة عليه حْسِيفَة
قال لها أنا أتاي و أتاي الحار
ودَايْرين لي الـحْوَانت ف كل دَوَّار
ماشي بحالك ألقهوة كحلة كيف الغبار
واللي شربك كيَنْعَس ف السبيطار
قال أنا القهوة أصلي حبوب
والله إلا كحلة ما فـيَّ كذوب
البْريق كيَتْشَحَّر بالعوافي كيذوب
الرَّابوز كيسُوط بالعوافي مثقوب
المجمر حامي بالعوافي مقلوب
قال لها أنا أتاي الـمنسوم
جيت مْلَكَّك عندي أربعة النجوم
أتاي بلا إِقامة كُلُّو مظلوم
ماشي بحالك كحلة بحال الـحْمُوم
قال لو أنا القهوة عندي الراس
جيت مْلَكّْكَة وجِيت من فاس
دايْرينْ ليَّا البرارد من النحاس
وكَنْفِيَّقْهم ف الصباح باقْيِين ف النعاس
البريق كيتشحر ويْعَمَّر الكاس
ماشي بحالك أنت طَيَّحْتِ لِنَا الضْرَاس
اخرج يا ولد الحرام اغطس خلاص
قال لها أنا أتاي و أتاي الـمَزْيان
فـيَّ الصِّدق وفـيَّ لَـمَان
وجيت مْلَكَّك على يد سيدنا مولاي الحسن
ما بْقِيتْشْ كَنتْباع ف الجورنان
ماشي بحالك ألقهوة كحلة بحال القطران
سيري بحالك راكِ وَسَّخْتِي الكيسان
قالت لو أنا القهوة شادَّا البلاصة الناس كلها علي عَسَّاسا
اللي قارْيِيـن واللي مْدَوْزِين ف المدرسة
ماشي بحالك أيتاي غَا حْلاسة
كايشربوك غا السُّرَّاح وْلاَ كَايَنْ شِي خَـمَّاسا
قال لها أنا أتاي و أتاي الزعامة
ما نحتاج إقامة
والناس عليَّ خَدَّاما
لا اللِّي ف الأرض ولا اللِّي ف السَّما
ماشي بحالك ألقهوة كحلة بحال الرخامة
قالت لو أنا القهوة كحلة مسكينة
الناس كلها تْبْلاتْ بِنَا
لا اللِّي ف البادية ولا اللِّي ف المدينة
سير بحالك أَيَتَايْ أنت َبَـهْدَلْتِ بِنَ
اتبعتِ بكْبالة هذا كلام مول النخالة

*منقول :هذه القصيدة تم تدوينها سنة 1980 بدوار أولاد كثير بمنطقة الغرب وهي لمؤلف مجهول ، كل ما يعرف عنه أنه “مول النخالة”وهي بالدارجة المغربية.