ثقافة وفن
قصيدة: آخر الكلام
بقلم نورالدين بن شقرون
مالك حاسب خطواتي
ديما تابعني خلسة
تظل مراقب حياتي
وداير منها فقسة
انت اكبر حسادي
حاسدني على الهنا
أنا نسيت الماضي
وكل ماسرا وجرا
ما من عادتي نحافي
وقلبت ديك الصفحة
زد وصيت أولادي
ينساووا ديك الهضرة
يتعاملوا بقلب صافي
ويتجاوزوا كل أزمة
العداوة اليوم بالوافي
بنادم ما بغى ينسى
دغيا يگدي العوافي
والحقد داير خبلة
عندي ستر العاطي
خير الله مايتحصا
نمشي بقدم حافي
وعلى داري مانتخلا
مانحسد ما نحافي
ناسي أكبر ثروة
معول على قدراتي
وعلى مول الخبزة
رزقو فايت وكافي
يعطيني بلا منة
انت ياالسامع لكلامي
داري ماشي همزة
تعامل معايا بصحرائي
وإلا بقى تما.
