نداء لكل مغربي.

بقلم : محمد دومو // مراكش

(زجل مغربي)

نبدا بالحمد والشكر كلامي
لموجه لكل حر..مأصل وغالي
مغربي مفتاخر..
حاضر بهويتو كاين
ماشي ذاك المقيت
عيفة الرجال الخداع والخاين
هذي خطة جمعات كل لمغاربة
صورة واضحة،
وحدات فالملعب كل اللعابة
ماشي سياسة من عند لحزاب
لي ما يجي من جلهم غير الخراب
أسود الأطلس معروفة فالغابة
راه مفهومة عند الكل تهجم وتزيد
ما تخاف.. ما تدهش..
لا من قريب.. ولا من بعيد..
فيقو من النعاس لا حاجة فيه تليق
راه الوطن غالي واصبح كيضيع
وحدو الكلمة كونو رجال رزان
بحال منتخابنا لي شرفنا فقطر
يا السامع قوم بدور صحيح يفيد
هذا زمان السرعة وياك توخر وتخيب
براكة كثرة لكلام الخاوي واللغيط
لازم تجري وتنوض فالحين وتعيد
وتساير الركب الغادي بالتحقيق
لا تيأس..ولا تعيى فالطريق
لمنتخب عطاكم درس ثمين وغالي
تبعو طريق الخير الواضح ولمليح
كونو شداد ورزان بلا تيهة فاسدة
لبلاد محتاجة لذاك الخادم الرفيع
لكلام الخاوي ما يقضي حاجة تدوم
ما يسوى درهم واحد يعمي الجوع
شارك وشاور وسير وتوكل
وعاود الشوار من لمجرب ثاني
وياك التسرع قبل ما تيقن وتختار
الغش موجود ولازم تحاربو ديما
وبدا من راسك قبل من ذاك الغير
المغرب قوة حاضرة من زمان
مسجل بعامو..وبملوكو الشداد ولحرار
ارجع وطالع فكتوب الرفوف
وبلا تلفة.. تلقاهم مسجلين فالتريخ
لا تدهش يا الغادي وتمعن مزيان
ولا تخاف كثير من هاذ لكلام
المغربي سبع ما يفشل ولا يحير
يا ولاد بلادي يا السامعين ليوم
تمعنو فلكلام قبل ما تشقو الطريق
الحق..يبقى حق..ديما حاضر
لا تشك فيه..
ولا تغيرو.. وتيه
راه النية تغلبك ديما يا مسكين
الوطن الزين والغالي والشديد
كيتعرف برجالو مغيارين
بالتضحية سايرين لݣدام
وانتوما خير الرجال فهاذ الزمان.
يا السامع النداء تمعن ف لكلام.
زرع حبة وحدة..تكون غدا خير
ولا شجرة.. تغدي بثمارها ناس كثير.
بني مسايل مزيانة تبان..
نقي الطريق من لحجر والشوك.
تحمس وفيق وقاوم..
براكة عليك من لعݣز والشخير..
أنا نخدم من جيهتي اليوم وغادي
وأنت يا صاحبي من جهتك ثاني..
الكل متحمس بالمعقول لي يليق.
هكذا نواصلو السفر فهاذ الطريق.