قوم النخالة

نورالدين بن شقرون/مكتب مراكش

ياناس بحالي ياقوم النخالة
نحتلو دغيا في الغربال
نساء وصبيان وزيد الرجالة
لافرق بين صحيح ومعلال
مايحن حتى فصحابو الگوالة
واخا اعطاووه شلا أقوال
باعونا بوالو وبكل نذالة
وتوخرو ينشو على الكبال

ياناس سهمنا غير النخالة
غواتنا عندو مجرد موال
عارفنا ضعاف ومجرد حوالة
شحال هاذي غادرونا الرجال
كان شاطر في سوق الدلالة
من كلامو كان باين حلحال
لقانا مهزومين وحالتنا حالة
أصبح القوم عليه عوال
ملينا وعود الخوت الدجالة
قلنا هذا بفلوسو ماشي محتال

دغيا لقينا حلمنا سالا
فرق كبير بين لقوال ولفعال
السيد فصل قشابتو احسن فصالة
وأصبح كلشي عندو حلال
وحنا نبرقوا بحال الجهالة
الحكيم فينا ركبوا لهبال
وايييه شحال الوقت بدالة
البصلة رجعات تبان بحال الهلال
خضرتنا في أوروبا جوالة
والسوق كلشي فيه بسال

دار فيها الزمان وولات حتالة
الزريقة حدها عند البقال
بها كنتي تفلت من النخالة
واليوم انت حاصل في الغربال
تظل تغوت والغوات فيك سلالة
صدى صوتك يردده الجبال
انت تصيح بارك من البسالة
والجواب يجيك ب لا…..لا…لا

مراكش : 2023/04/08