شجرة الصبر

نورالدين بن شقرون/مكتب مراكش

غابت الشتا من عند مولاها
نطلبوا الله يغيثنا بالوافي
يبسات الأرض وجف ماها
نشفات البيار ووكحات المطافي
جات الحرب بخلاها وجلاها
زادت كملات الباهية وصافي
كيف العادة البترول بداها
البرميل منو تزاد بالكافي
السلعة بعدو صبحات ماعلاها
السوق نايضة فيه العوافي
البصلة ل كان حد مابغاها
ثمن الكيلو اليوم خرافي
مطيشة بلا ما تقرب حداها
الخضار مافيه ماتحافي

البطاطا الكبيرة النقية فقدناها
عليك بالمسوس منها إلا باقي
الخضرا الاخرى أحسن تنساها
ووصل الأخبار لحبابي ورفاقي
فين أيام الطنجية والنزاها
والمليجات ل ولفاتها أذواقي
اللحم اليوم عافية ماگداها
ثمنها تجاوز جهدي وارزاقي
لحم الدجاج رجعات ماغلاها
بها كان المسكين يرقع ويلاقي

الدولة خدات الوقت ل كفاها
و كالعادة خرجات لينا بالعلالي
البوصلة وسط الأزمة تلفناها
مركبنا في يد ربنا العالي
شحال من أزمة تجاوزناها
حلات بنا على التوالي
أشجار الصبر ياما غرسناها
سقاها المسكين بلا مايبالي
غلتها قطفوها وما شفناها
حقنا عند ل خيرو مايسالي

مراكش: 2023/02/18