سوق الكلام ( قصيدة زجلية )

نورالدين بن شقرون/ مكتب مراكش

مشيت نتقدى الكلام
لقيت السوق قاسح
اثمنة جابت لي التمام
بقيت غادي سارح
شفت راسي من لقزام
اصحاب الجيب الواكح

بان لي مول العرام *
حاط سلعة البارح
خفت نكون من الغشام
ويصدق كلام جارح

قلت نقضي ونزيد القوام
كلامي يرجع صالح
يفهموه القاريين والعوام
ولفوني ديما واضح
تخيلتو مصدر إلهام
نتمنى نكون فالح

بديت بالصلاة والسلام
على ل الطيب منو فايح
سيد العرب ولعجام
محمد زين الملامح
المصطفى العلي المقام
كل كلامي ليه مادح

خديت درس للدوام
باش مانبقاش دالح
نقلب على زين الكلام
وزين الكلمة في التسابح
السوق والعرام توام
عند مول العقل الراجح

*مول العرام: التاجر الصغير الذي يفترش الأرض

مراكش: 2024/05/14