سوق الدولار ( قصة زجلية )

نورالدين بن شقرون/ مكتب مراكش

گالوا في لخبار
واخبارهم نفار
تصدع لي ودنيا

هبطات لسعار
مابقى سمسار
في سوق الضحية

خرفان الجار
فيها ما تختار
تگولها هدية

صدقت لخبار
ماخذيت شوار
ومشيت بذيك النية

سولت ع الجار
لقيتو طار
وسلعتو كعبية

لسعار تگدي نار
اثمنة تجيب لمرار
والسوق كلو سماسرية

بقيت طول النهار
مع اصحاب الدولار
وانا معايا قسمية

رجعت للدار
نخطو بالعبار
ودموعي في عينيا

واخا دموعي بالتقتار
غلبها السوق المكار
نزلات بلا ماتشاور ليا

مالف سنة المختار
نحييها ك ماشار
الصلاة عليه صباح وعشية

السوق اعطاني اشعار
من بحالي باغي التيقار
هاذ العام نقضيووا بقنية

مراكش 2024/06/12