عيالات ” الفاسط فود ” Fast Food” ( قصيدة زجلية )
نورالدين بن شقرون
صغيرة وجميلة
من أسرة كريمة
معروفة وعريقة
بنت الحاج خليفة
الوحيدة عند اباها
صانها ورباها
ساع ماقراها
من الابتدائي خلاها
في الدار مع ماماها
مفششاها ومخنتاها
حتى ” لومليط” جاهلاها
حاولات معها في الصنعة
طرز الحساب على الدمة
يزول على المرأة الغمة
يعطيها قيمة في اللمة
ويخليها ديما في القمة
بداووا معها ب” الكانبا ”
عيونها كبيرة وواسعة
ساع بقات فيها غابرة
العقل مشطون وتالفا
الصنعة ماشي ساهلة
لازمها بنت حادكة
كبرات وعطات للعين
تقدم ليها موظف كبير
باغي يكمل دينو في الحين
اباها قبل بلا تأخير
الشاب بحالو اليوم قليل
هذي نعمة وخير كثير
الحاج معروف بالانسانية
ماعندو مع الحسابات المادية
ديما يكرر بنبرة عالية
أنا أب وعليا مسؤولية
ماشي تاجر في سوق الماشية
سعادة ابنتي أهم وأولوية
مبلغ الصداق ماعندو أهمية
أسلافنا تزوجوا بسور قرآنية
الزواج فيه نفحات ربانية
دخلات للزمان وتلفات
تظل تحفظ الوصفات
بزز والكشيفة تعلمات
ابسط ماكاين في الأكلات
البيض والخليع ولومليطات
في التلفون لقات الحل
نشكروه حيد علينا الذل
كل حاجة خاصها المهل
بالكوموند يوصلك ت القن
الراجل حشم على عراضو
ديما يلقى المزاح قدامو
ماكلة الزنقة ماشي عادتو
السيد كابر حدا للا طامو
محكوك مزيان على وصالو
يأكل في الدار وهذا حالو
صبر ومل من الوضعية
اتصل بامها الحاجة هنية
بحال ابنتك ماتستوعبها العقلية
الزين بوحدو ماقضى ليا
لازمها تعرف غير شويية
ماشي تنصب ليا المروزية
خليها حداك وعلميها مزيان
راه متبوعة بالوقت والزمان
هانا عند الوالدة وهذا ماكان
الفاسط فود ماشي على الدوام
الكانبا: ثوب غليظ فيه فتحات جد واسعة يستعمل
في طرز الحساب لتعليم الفتيات.
04/02/2021
